portal.guldu.uz

Мамлакатимиз мустақиллигининг 20 йиллиги арафасида Президентимиз Ислом Каримовнинг ““Ўзбекистон мустақилликка эришиш остонасида” китоби нашр этилиши мамлакатимизнинг ижтимоий-сиёсий, маданий-маънавий ҳаётидаги улкан воқеа бўлди. Бу китоб мустақилликка эришиш йўлида яқин ўтмиш тарихимизда, яъни 1989 – 1991 йиллар мобайнида олиб борилган ўта оғир ва машаққатли курашлар тарихи ёритилган манба сифатида бениҳоя аҳамиятлидир. Бу асар ўзининг тарихий манба сифатидаги аҳамияти билан миллий давлатчилигимиз тарихида улуғ давлат арбоблари сифатида қолган, буюк салтанатлар барпо этган буюк боболаримиз томонидан яратилган "Темур тузуклари", "Бобурнома" каби асарлар билан бир қаторда туришини эътироф этиш мумкин.
Китобнинг “Ўзбекистон мустақилликка эришиш остонасида” деб номланиши бежиз эмас, албатта. У яқин ўтмишимизнинг мураккаб тариxий-сиёсий жараёнлар, жумладан, ўзига хос иқтисодий, мафкуравий инқироз даври бўлган ғоят оғир ва таҳликали бир вазиятда Ўзбекистон рахбари сифатида иш бошлаган Ислом Каримовнинг юртимизни чуқур инқироздан олиб чиқиш, уни қатъият ва матонат билан истиқлол сари бошлаш, Ватанимиз мустақиллигини эълон қилиш, умумxалқ сайловида ғолиб чиқиб, Президентлик қасамёдини қабул қилишигача бўлган, тинимсиз курашлар, кескин синов ва машаққатлар билан ўтган фаолият даврини ўз ичига олади.
Китобга киритилган нутқ ва маърузаларда ўша даврдаги ўта драматик воқеалар, тариxий ўзгаришлар қандай мураккаб вазиятларда юз бергани, уларнинг тафсилоти, сабаб ва оқибатлари атрофлича ёритиб берилади.
Таъкидлаш жоизки, ушбу чиқишлар халқимиз, жамиятимиз босиб ўтган тарихий тараққиёт йўлини акс эттириши билангина эмас, аввало, бу йўлдаги оғир қийинчиликлар ва синовлар, турли ғов-тўсиқларни бартараф этишга қаратилгани, мустақилликка эришиш жараёнлари биз учун нақадар машаққатли, ўта драматик ва ҳаёжонли воқеаларга бой бўлганини ёрқин акс этттириши билан ҳам алоҳида эътиборлидир.