“Umumiy pedagogika” fanini chuqur o’zlashtirishda seminar mashg’ulotlar muhim ahamiyat kasb etadi. Seminar mashg’ulot – o’quv materialini jamoa bo’lib o’zlashtirish, murakkablik darajasi turlicha bo’lgan topshiriqlar, amaliy vazifalarni auditoriyada ijodiy va mustaqil bajarish asosida nazariy bilim, amaliy ko’nikma va malakalarni shakllantirishga qaratilgan tizimli faoliyatdir. Shuningdek, amaliy mashg’ulot – muayyan fandan o’quv dasturida belgilangan bilim, ko’nikma va malakaning ma’lum bir qismini fanning ishchi o’quv dasturida ko’zda tutilgan hajmdagi amaliy mashg’ulot soatlarida talaba tomonidan fan o’qituvchisining bevosita rahbarligi asosida auditoriyada o’zlashtirilishiga yo’naltirilgan tizimli faoliyatdir.
Seminar mashg’ulotning asosiy maqsadi pedagog-xodimning rahbarligi va nazorati ostida talabada muayyan o’quv ishlarini auditoriya sharoitida bajarish uchun zarur bo’lgan bilim va ko’nikmalarni shakllantirish hamda rivojlantirishdir. Seminar mashg’ulotga talaba darsliklar, o’quv adabiyotlari, gazeta va jurnallar, radio va televideniye, elektron darsliklar va o’quv qo’llanmalari, Internet resurslari, ZiyoNET materiallari va fanning o’quv-uslubiy majmualaridan foydalangan holda tayyorgarlik ko’rib kelishi nazarda tutiladi.